శ్రీహనుమంతుడు శ్రీరాముని భక్తుడా? - భాగం-2

శ్రీరాముని కలవక ముందే శ్రీహనుమంతుడు వేదవిద్యావిశారదుడు, సిద్ధులు కలిగిన ఒక యోగి అని శ్రీమద్రామాయణం చెబుతోంది.

1)       మొదటిసారి శ్రీహనుమంతుని కలసినపుడు, అతని సంభాషణ చాతుర్యాన్ని గమనించి, శ్రీరాముడు ఇలా అంటాడు.

నాన్ ఋగ్వేద వినీతస్య నాऽయజుర్వెద ధారిణ: |
నాऽసామవేద విదుష: శక్యం ఏవ ప్రభాషితుం ||   (కిష్కిందకాండ 3వ సర్గ 29వ శ్లోకం)

"ఋగ్వేదమునందును, యజుర్వేదమునందును, సామవేదమునందును సుశిక్షితుడైనవాడు మాత్రమే ఇట్లు మాట్లాడుటకు సమర్ధుడు."

-----------------

 శ్రీహనుమంతుడు  సిద్ధులు కలిగిన ఒక యోగి అని సుందరకాండ ద్వారా మనకు పరిచయమవుతాడు.

స్వర్గీయ శ్రీ గుంటూరు శేషేంద్రశర్మగారు తన "షోడశి - రామాయణ రహస్యములు" అనే పుస్తకములో (పుటలు 69 - 70), శ్రీహనుమంతుడు  ఒక యోగి అని ఈ క్రింది విధంగా చెబుతారు.

2)       శ్రీహనుమంతుడు ఇంద్రియ పాలకులను స్తుతించి హనుమ కుండలినీ యోగమున కుపక్రమించుచు అవలంబించిన యోగాసనమును ఎట్లు వాల్మీకి చెప్పెనో ఆ చిత్రము చూడుడు.

బాహు సంస్తంభయామాస మహాపరిఘసన్నిభౌ |
ససాద చ కపి: కట్యాం చరణౌ సంచుకోచ చ ||    (సుందరకాండ 1వ సర్గ 35వ శ్లోకం)

సంహృత్య చ భుజౌ శ్రీమన్ తథైవ చ శిరోధరం |
తేజస్సత్త్వం తథా వీర్యమావివేశ స వీర్యవాన్ ||   (సుందరకాండ 1వ సర్గ 36వ శ్లోకం)

"అనగా, ఆయన పరిఘములవంటి బాహువులను స్తంభింపచేసెను.  కటిమీద కూర్చుండెను.  చరణములను ముడుచుకొనెను.  చేతులను కంఠమును ముడుచుకొనెను.  ఇది యోగులు శ్రేష్ఠమని భావించు సిద్ధాసనము కావచ్చును.

తత్ప్రకారము - శిశ్నము మీద ఎడమ మడిమ చేర్చి, దానిపై కుడిమడిమ ఉంచి, కటిపై కూర్చుండి నాసాగ్రమున దృష్టి సారించుట.  యద్వా- ఇది పూర్వ తాణువాసనము కావచ్చును.  అది - కాలి వ్రేళ్ళు మడచి, మడమలు, పిరుదులు చేర్చి తలను చేతులతోను, నడుము మోచేతులతోను అదిమి పట్టుకొని నడుము నిక్కించుట."

3)    శ్రీరాముని రూపురేఖలను, లక్షణాలను సీతకు  వివరించి చెప్పి, తన గురించి  శ్రీహనుమంతుడు ఇలా అంటాడు.

తస్య అహం హరిణ: క్షేత్రే జాతో వాతేన మైథిలి |
హనూమాన్ ఇతి విఖ్యాతో లొకె స్వేన ఎవ కర్మణా ||  (సుందరకాండ 35వ సర్గ 82వ శ్లోకం)

"ఓ సీతా! నేను కపియైన కేసరి భార్యయందు వాయువు అనుగ్రహంతో జన్మించాను.  నా పనిచేత  నేను లోకమున హనుమంతుడని పేరు పొందితిని."

కానీ ఆ పని ఏమిటో అచ్చట చెప్పలేదు.  "హనుమంతుడు" అనగా దౌడకలవాడు అనిగాని ఎడమ దౌడ విరిగినవాడని కాదు గదా అర్థము.  కనుక అది సరిపోదు.  దౌడలు కలవాడు అని ఒక పేరు పెట్టుట నిరర్ధము.

స్వర్గీయ శ్రీ గుంటూరు శేషేంద్రశర్మగారు తన "షోడశి - రామాయణ రహస్యములు" అనే పుస్తకములో (పుట 80) ఈ క్రింది విధంగా చెబుతారు.

"హనుమత్" అనగా దౌడలు కలది.  ఏది?  "అంతరేణ తాలుకే య ఏషస్తన ఇవావలంబతే - సేంద్రయోని:" అని తైత్తిరీయము చెప్పినది.

తాలుకలు రెంటిమధ్య వ్రేలాడునది సుషుమ్న, అదే బ్రహ్మ ద్వారము - కనుక తాలుకావత్ అన్నచో సుషుమ్న యగును కదా -  హనుమత్ అన్నను అదే.

"హనుమాన్" అని పుంలింగ శబ్దముగా నామధేయమైనది.  ఒక యోగికి సుషుమ్నుడు అని పేరు పెట్టుట సార్థకము.  కనుక హనుమ యోగి.

4)   తను కోరుకున్నప్పుడు తన ఆకారముని పెంచుట, తగ్గించుట సిద్ధులుగా చెప్పబడుతాయి.  సుందరకాండలోని ఘటనలు ఈ విషయాన్ని నిరూపిస్తాయి.