శ్రీమద్రామాయణ కావ్యం వ్రాసినదెవరు?

శ్రీమద్రామాయణము ప్రతి సర్గ తరువాత "ఇత్యార్షే శ్రీమద్రామాయణే వాల్మీకీయే ఆదికావ్యే..." అని ఉండి తరువాత కాండ, సర్గల పేర్లు ఉంటాయి.   

శ్రీమద్రామాయణ కావ్య ప్రారంభంలో, బాలకాండలోని  మొదటి 4 సర్గలలో తప్ప వాల్మీకే ఈ కావ్యం వ్రాసినట్లు ఎక్కడా చెప్పబడలేదు.     శ్రీమద్రామాయణ కావ్య ప్రారంభంలో, బాలకాండలోని మొదటి 4 సర్గలలోను, అయోధ్యకాండలో ఒకేసారి, ఉత్తరకాండలో తప్ప వాల్మికి ప్రస్తావన కనిపించదు.

బాలకాండలో, మొదటి 4 సర్గలలో వాల్మీకే ఈ కావ్యం వ్రాసినట్లు చెప్పబడినా, అందులో శ్రీ మహావిష్ణువు గురించి కీర్తిస్తూ ఉండడం వల్లను, మరి కొన్ని కారణాల వల్లను, ఆ 4 సర్గలు ప్రక్షిప్తమని వాదన ఉంది.     ఉత్తరకాండ మొత్తం ప్రక్షిప్తమని ఇదివరకే చెప్పాను.

------------

అయోధ్యకాండలో ఒకేసారి వచ్చే వాల్మికి ప్రస్తావన  ఇలా ఉంటుంది.  చిత్రకూట పర్వతప్రాంతానికి చేరేముందు, సీతారామలక్ష్మణులు వాల్మికి మహర్షిని కలుస్తారు. 

ఇతి సీతా చ రామశ్చ లక్ష్మణశ్చ కృతాంజలి: |

అభిగమ్యాశ్రమం సర్వే వాల్మీకిం అభివాదయన్ ||     (అయోధ్యకాండము - 56వ సర్గ 16వ శ్లోకము )

"పిదప సీతారామలక్ష్మణులు వాల్మికి మహర్షి ఆశ్రమమునకేగి, దోసిలియొగ్గి, ఆ మునీశ్వరునకు ప్రణమిల్లిరి." 

తాన్మహర్షి: ప్రముదిత: పూజయామాస ధర్మవిత్ |

ఆస్యతామితి చోవాచ స్వాగతం తు నివేద్య చ ||     (అయోధ్యకాండము - 56వ సర్గ 17వ శ్లోకము )

"ధర్మాతుడైన వాల్మికి మహర్షి సీతారామలక్ష్మణులరాకకు మిగుల సంతసించి, ''మీకు స్వాగతము,విచ్చేయుడు, ఆసీనులుకండు", అని పలుకుచు వారికి ఆదరసత్కారములను నెఱపెను."

-----------------

శ్రీరాముని కాలంవారెవరైనా, శ్రీరాముని జీవిత విశేషాలు క్షుణ్ణంగా తెలిసిన వారు, లోకకళ్యాణం కోరి, శ్రీమద్రామాయణ కావ్యం రచించి, తమ పేరు బయటకు రాకూడదని, వాల్మికి మహర్షి పాత్రను సృష్టించి ఉండవచ్చు.

బాలకాండలోని మొదటి 4 సర్గలు ప్రక్షిప్తమనుకుంటే, శ్రీరామయాణంతో ముడిపడ్డ ప్రతిపాత్రయొక్క మనోభావాలన్నీ తెలుస్తాయని, స్వయంభుబ్రహ్మ వాల్మీకి మహర్షికి ఇచ్చిన వరం ప్రక్షిప్తమవుతుంది.

అప్పుడు వాల్మీకి మహర్షి ఈ కావ్యకర్త కాదని అనిపిస్తుంది.

శ్రీమద్రామాయణ కావ్యం శ్రీరాముని సమకాలికులు మరెవరైనా వ్రాసారని అనుకుంటే, ఆ కవికి శ్రీరామయాణంతో ముడిపడ్డ ప్రతిపాత్రయొక్క మనోభావాలన్నీ తెలియాలి కద!

ఇంకా ఆ కవి వేదవిదుడయ్యి ఉండాలి. ప్రతి వ్యక్తిని నిశితంగా పరిశీలించే ప్రజ్ఞ ఉండాలి. స్థితప్రజ్ఞుడయి ఉండాలి. ప్రధాన పాత్రధారులైన శ్రీరామ, సీత, లక్షణ, సుగ్రీవ, విభీషణాదులతో సాన్నిహిత్యముండి ఉండాలి.

ఇన్ని లక్షణాలుండి ఆ కవి లోకకళ్యాణమాసించే వ్యక్తి అయిఉండాలి. అటువంటి వ్యక్తి మరెవరున్నారు. శ్రీహనుమంతుడు తప్ప.

శ్రీమద్రామాయణ కావ్యం శ్రీహనుమంతుడే వ్రాసి ఉండాలి.